issuu.com ?

بإذن الله أغلب كتاباتي بتلقونها على هالموقع :-

http://issuu.com/bnt-aisha95

حيــــاكم الرحمــــــن ❤️

وُلـدت شيعيـة ثم اهتديـت

بسم الله الرحمن الرحيم

 

أول شيء أعرفكم على نفسي ..

اسمي : بنت عائشة .. رضي الله عنها و أرضاها

مواليد : 1995 م

و لله الحمد .. وُلدت شيعية ، ثم هداني الله و تسننت ..

و هالكلام صار لمن كان عمري 14 ونص تقريباً ..

و كان و مازال بدون علم أهلي ..

بس الله يهديهم يا رب و يتقبل منا صالح أعمالنا و يثبتنا ..

 

 إن شاءالله راح أتكلم عن الصعوبات إلي واجهتني

و بفضل الله .. الله مقدرني على أني أتغلب عليها ..
 

تجربة يديده .. و أعتبرها البداية

فإن أصبت فمن الله ، و إن أخطأت فمن نفسي

 

ابتسم .. أخذ نفس عميق .. و يلا نتوكل على الله

بــســم اللــه ...

 

في البداية .. حابه أكتب لكم شلون تسننت ..

لمن كنت شيعية ، كنت وايد وايد وايد ملتزمة و تقريباً أسوي كل إلي أسمعه

من المعممين خااااصة ( محمد الفالي ) ..

حتى أذكر كنت أقول حق أهلي أنا أسمي ( فلانة الفالي ) من كثر ماكنت

أحب أسلوبه و أتابعه و أنطر محاضراته

أنا كنت أكثر وحده من أهلنا كنت الملتزمة حييييل تقريباً ، لي درجة أن أهلي

يضايقوني و يتطنزون علي بعض المرات

فـوقتها كنت مشتركة بمنتدى عشان أقضي وقت فراغي فيه

و كنت أشكره الوحيدة شيعية .. لأنه أصلاً ماكان منتدى كويتي

بيوم من الأيام وصلت لي رسالة من الإدارة ، تفاجأت بلي مكتوب فيها !!

كانت نصايح و كلام ماصدقته عن الشيعة ، حدي عصبت على إلي دزلي الرسالة

و كان يدز و يدز .. مليت ، عصبت ، تنرفزت .. أنا شيعية و ما أرضى

فقلت خل أرد عليه عشان أفتك منه و مايدزلي مرة ثانية أي شي يضايقني

دزلي صورتين لكتب شيعية و جم مقطع عن الشيعة بأنهم

يقرون بتحريف القرآن و يحللون المتعة للنساء و الأطفال !

وايد انصدمت بس ماكنت عارفة شنو تحليل المتعة

بس بنفس الوقت دشيت قوقل و شفت كلام الشيعة عنها

فهمت أنها كــ( الزنا ) بس باسم ثاني .. أستغفرالله

استغربت شلون جذي ؟ يعني إحنا " الشيعة " نحلل إلي الله و رسوله حرموه

معقوووووله ؟!

 

تبون الإجابة ؟ اقروها ..

روى الصدوق عن الصادق عليه السلام قال: (إن المتعة ديني ودين آبائي فمن عمل بـها عمل بديننا، ومن أنكرها أنكر ديننا، واعتقد بغير ديننا) (من لا يحضره الفقيه 3/366)

 

و هالحديث فيه تكفير للي مايقبل المتعة ..

يعني يا شيعي أنت كافر لو ما زنيت .. أقصد زنيت

و العياذ بالله ، طبعاً هالحديث الله أعلم من وين يايبينه !!

الله المستعان

 

المهم ، اقتنعت بسهولة بعد إلي قريته عن المتعة و تحريف القرآن

و بنفس الوقت سبحان الله طلبت من الريّال يعلمني الصلاة و الوضوء

عطاني مقاطع عن الوضوء و الصلاة و نقلتهم بورقة

لأن الاختلاف كبير و واضح حيييييل حيل

و بعدها ما كلمني إلا مرة و سألني عن وضعي و بس

اسأل الله أن يكتب له الأجر و يثبتنا ..

المهم أنا دشيت قوقل و قمت أدور و أبحث و عرفت أشياء وايد

عن الأشياء إلي أبيها

و هالكلام كان في العشر الأواخر من رمضان

 

متى تسننت ؟ متى كانت أول صلاة لي مثل الرسول صلى الله عليه وسلم ؟

بأول يوم العيد .. صلاة الظهر ، ما أنسى هاليوم .. كنت توني لابسه ملابسي العيد

و لبست ثوب الصلاة و حطيت الورقة إلي فيها خطوات الصلاة جدامي

و صليت و أنا أقراها .. والله العظيم كان شعور عجيب

هنيااااالي والله ... أسلمت !!

ما أجذب عليكم بس حسيت أني بالطريج الصحيح

و مازال هالإحساس موجود لله الحمد

بعد فترة .. أهلي قاموا يشكون فيني و بتصرفاتي

يعني : ماقمت أتابع القنوات الشيعية و ما أسولف عنهم

و لاحظوا أني أصلي كل صلاة بوقتها و وضوئي غير عنهم

لأن الشيعة يجمعون الظهر مع العصر و المغرب مع العشاء

و الوضوء غير وايد .. وللأسف الرسول صلى الله عليه وسلم

و أهل البيت .. ماكانوا يجمعون بأي وقت ! يعني الشيعة يخالفون

الرسول و أهل البيت

 

كانت تصيرلي وايد مشاكل خاصة بوقت الإمتحانات و أنا كنت بالصف التاسع

الكورس الثاني .. يعني مابقالي شي لازم أشد حيلي

بس للأسف كانت فترة صعبة بالنسبة لي و كنت كله متضايقة و ما أقدر أركز بدراستي ، لأن وقتها محد كان يدري عني

حتى رفيجاتي مايدرون أني متسننة ، و كنت أتمنى أكلم شخص كبير

يفهمني و أقوله عن إلي بقلبي .. بس لله الحمد ربي كان معاي

المهم ,, أبوي بليل كان يدش علي الدار و يكلمني عن السنة أنهم غلط

و ليش أنا متغيرة ؟ كنت أحاول أبي أتجرأ و أقول شي عشان أدافع عن مذهبي

بس ماقدر لأني أخاف ..

بس مرة سويت شغله عمري ما أنساها .. تقدرون تقولون ( بعتها ) ههههه !!

دخلت عند أمي وأنا خايفة بس هم شوي بجرأة ..

قلتلها : يماه إذا تسننت شنو راح يصير ؟

ماشوف إلا الوالدة الله يحفظها معصبة و داقه على أبوي و تعال شوف بنتك

شتقول و مادري شنو ....

المهم الوالد الله يخليه لنا يه البيت جان يقول : يا فلانة ..

إن دريت أنج متسننة أو متسننة من وراي و أنا مادري .. فأنا متبري منج

و موراضي عنج لي يوم القيامة

 

طبعا هالجملة أنا سامعتها 3 مرات يمكن ..

و مرة وصلت السالفة للطرد من البيت .. تخيلوا بس !!

كنت أخاف من كلامهم بس شعاري :

من كان مع الله

كان الله معه

فكن مع الله دوماً و لا تبالي

 

كنت أبجي ، كنت أحترق .. مثل ماقلتلكم أبي شخص يفهمني

بس يريحني بكلامه .. بس الحمدلله كان الله معاي

و ألجأ له وحده و سبحانه ( الستير ) ستر علي وايد

 

بيوم من الأيام بنهاية الصف التاسع رحت حق أثنين من رفيجاتي السنة

إلي حيل أنا معاهم قلتلهم : سارة .. حصة .. أنا متسننة

انصدموا ههههه

 

قلتلهم : نفسيتي تعبانة

قالولي : روحي كلمي أبلة مريم الإسلامية ، هالأبلة كنت أحبها وأعزها حيل

كنت حاطه فبالي أنها 100% إن شاءالله راح توقف معاي

 

للحين أتذكر الموقف و ما  أنساه

تجرأت و رحت لها بالقسم ..

أنا : أبلة ممكن أكلمج بموضوع لوسمحتي

الأبلة : أي أكيد .. و طلعت معاي برا القسم

أنا : قلت السالفة باختصار و عيني متروسة دموع ببجي ، أبلة أبيج تساعديني

الأبلة : مبتسمه .. ماقدر أساعدج أخاف أحد يعرف

أنا : ابتسم .. مشكورة أبلة .. و رحت

 

انكسرت !! أي أنكسرت !! توقعتها بتوقف معاي .. الله كريم

رفيجاتي قالولي روحي حق الوكيلة ..

ضحكت قلتلهم من صجكم ؟ الوكيلة شكو !! كلش ماله داعي

قالوا : عيل روحي حق الإخصائية .. و سحبوني عندها غصب

و أنا كلش مو مقتنعة ..

 

المهم دشيت عندها و أنا ساكتة لو أقول : أ... راح أبجي على طول

أخيييييه أخييه !!!

 

رفيجتي : أبلة ترا فلانة جذي جذي جذي ..

الأخصائية : تطالعني .. أنتي يافلانة تكلمي

أنا : آآآآآآآآع !! هههه ماعليه بس كنت أبجي ماتكلمت

و طلعت من عندها للأسف بدون لا أستفيد شي !

بس بجيت ريّحت قلبي شويه ..

فبعدها خلاص حبيت أكوّن صداقات مع بنات السنة

اشتركت بمنتدى أنصار آل محمد و تعرفت على بنت سنية

وقالتلي : بكلم شيخ عثمان الخميس عنج و معاناتج مع أهلج

حدددددي استااانست .. أنا ؟ شيخ ؟ حده وناااااسة الحمدلله

حسيت الله سبحانه يابلي هالبنت عشان تريّحني و تسعدني

فلمن البنت كلمت الشيخ .. قالها :

أني أخش على أمي و أبوي سالفة التسنن و أصبر لين أتزوج

و أستقر .. بوقتها زوجي اهوا المسؤول عني "

 

كانت ردت فعلي : هاا !! أوكي أنا خاشه الموضوع

أما سالفة الزواج ما اقتنعت فيها كان وقتها عمري 16 أو بدش 16

و توني صغيرة أنا وين و الزواج وين !

يعني أبي حل يفيدني  حق عمري الحين مو حق المستقبل

تحملت الوضع و صرت أناقش الشيعة بالفيسبوك

و أكلم مشايخ الشيعة .. هه للأسف كانوا يتهربون مايردون عالأسئلة

شر البلية مايضحك !!

 

متى تحسن وضعي ؟ لمن دشيت الصف العاشر

يعني ثانية ثانوي ..

وايد حياتي تغيرت .. تعرفت على أبلة هدى الإسلامية تقربت منها

و كانت تساعدني وايد الله يذكرها بالخير و تشجعني و لله الحمد

للحيني أتواصل معاها و هالشي حيل يسعدني ..

تطورت .. صرت أصلي  الظهر بمسيد المدرسة

كان الوضع بالنسبة لي يديد و غريب ، ماعرف أتوضا بالمصلى

بنات صفي عرفوا أني متسننة فكان الوضع جدا عادي

لأن كانوا أغلبهم سنة .. بس في يوم انصدمت حدي .. شصار ؟

البنت الي تقعد يمي فطوم قالتي : فلانة أنتي أمج اسمها ***** ؟

انا : اي هذي أمي .. ليش ؟

فطوم : رفيجتي قالتلي أن أهلج يعانون منج و شاكين إنج سنية

أنا : أهااا .. *و من داخلي ناااااار أموت و أعرف منو هالبنت*

فطوم : آسفة فلانه ماقدر أقولج منو

أنا : تكفين أحلفلج بالله بس بعرف البنت والله ماراح أسوي شي بس بسلم عليها و بكلمها ، ودتني حق البنت اسمها إيمان

أول ما شفتها ضحكت معاها عادي جنه ماكو وشي ..

قلتلها : أبيج تكلميني عن الموضوع أنا مثل أختج و هالشي سر بينا !

إيمان : أمج مع أمي بنفس المدرسة و يدرسون نفس المادة و أمج قايله حق أمي هالكلام ...

و أنا إلي عرفته أنا أم إيمان وايد شديدة لي درجة حاطه كاميرا بغرفة بنتها

فخفت حيل أن أمي تسويي نفسها !!!

 

قلت حق إيمان : تكفين مابي الموضوع ينتشر و تكبر السالفة ، يعني سواء

أنا متسننة ولالا مابي تقولين حق أحد ، أنتي ماتدرين شنو ظروفي بالبيت و شنو مشاكلي

إيمان : أنا آسفة و لو أدري أنج جذي بتكلميني جان ماقلت السالفة حق فطوم

أنا : حصل خير و ماله داعي الأسف

و لله الحمد عدت السالفة على خيييييير .. الحمدلله

 

بعدها انتقلت للصف الحادي عشر ، بدعت عدل عدل عدل

تخيلوا أن بهالمرحلة بنت عمتي كانت معاي بنفس المدرسة !

بس أهيا أدبي و أنا علمي ..

و رفيجاتي بعاشر يدرون أني سنية ، و الحين راحوا أدبي و معاها بالصف

شوفوا شلون سبحان الله الله ستر علي و عدت السنة بدون لا تدري ولا تشك

سبحانه الستّير ..

كنت و لله الحمد ملتزمة بالصلاة في المسيد ..

وكانت أبلتنا الغالية أبلة منى .. عجيبة عجيبة عجيبة شقووول عنها والله أحبها !

كانت تيي تصلي فينا بالمسيد جماعة و تدرسنا بالصف ..

ففي يوم قالت بنااااات منو تبي تصلي فينا جماعة ؟

أنا أول وحده رفعت إيدي بدون تفكير قلت : أبببببله أنااااااا

" أصلا ولا مرة صليت جماعة و ماعرف ! "

قلتلها : أبلة ماعرف ، المهم جان تعلمني شسوي

فصليت بالبنات لأول مرة بحياتي .. و كان شعور حده عجيب

و إلي مجربه .. راح يحس بلي حسيت فيه ..

 

جرب تجمع ربعك حتى لو بس واحد .. و صل فيه  و حط فبالك أنك بتاخذ

أجره .. و تذكر أجر الصلاة في جماعة .. و شوف بشنو راح تحس فيه

المهم نكمل ,, كل يوم صارت بنت تصلي فينا جماعة .. بس الأنانية منو ؟

أنا هههه ، إهيا مو أنانية بس تنافس شريف

قال سبحانه : { و في ذلك فليتنافس المتنافسون }

يعني ماودي أحد يسبقني بالجنة .. أبي أسبقهم كلهم

الله يتقبل منا جميعاً ... و كانت أمنيتي أقرا القرآن بالإذاعة بس ماكنت جريئة

أخاف من المايك ..

بس في يوم البنت إلي تقرا بالإذاعة غابت ، جان تناديني أبلة البدنية تقولي

فلانة روحي أقري و دزتني

و أنا من الوناسة قفلت !!! هههه رحت لي الإذاعة وأنا موحاسة بنفسي كلش !!

و بالصف الثاني عشر .. الخريجة : فلانة بنت الحُمّيراء عائشة رضي الله عنها

أحم أحم .. خريجة 2013 ..

تجرأت و راحت حق رئيسة قسم الإسلامية .. و قرت سورة الملك عندها

و رئيسة القسم وافقت أنها تقرا بالإذاعة

فــــــالحمدلله أمنيتي تحققت و تجرأت أنا و قمت كل يوم أقرا بالإذاعة

إلا إذا غبت أو شفت بنت تبي تقرا أخليها تقرا بدالي

و هم لله الحمد .. اشتركت بمسابقة تلاوة القرآن بالمدرسة

لاتضحكون عليّ بس كنت الـ18 على منطقتنا

 

صج أني تضايقت .. بس الحمدلله كنت أتدرب و أقرا بروحي

حتى التجويد كنت معتمده على مادة القرآن و تقليد المشايخ

لأن ماعندي أحد يعلمني .. و لأنها أول مرة فالحمدلله يكفي أني خذيت

أجر ..

و صرت معروفة أني أنا أصلي بالبنات بالمسيد .. لي درجة أن أبلة أمل الإسلامية

تناديني : الشيخة – الإمامة فلانة ..هههه نسأل الله القبول

و مرة أبلة عليّا العربي بعد ما سلمنا قالتلي :

يا رب نشوفك إمام في الحرم ههههه قلتلها امييييين

عاد تصدقون حلمي أصير إمام بالحرم عشان أكسب أجر كل المصلين

من كل الأجناس .. ونااااااسة بس أنا بنت مايصير .. مجرد حلم

 

اممم بعض المرات أخليها رفيجتي تصلي عشان آخذ أجرها ههههه

الحين راح تقرا و تعرف ليش خليتها تصلي ..

المهم  ، حياتي وايد تغيرت بالثانوية للأفضل طبعا بفضل الله سبحانه

يعني ماكان عندي أحد وكله بروحي ، و فجأة لقيت نفسي بين سنة

و كلهم يعتبروني أختهم و منهم و فيهم و الأبلات كانوا وايد طيبين

و ينحبون و يشجعون على فعل الخير ، و لله الحمد كانت أمنيتي

أصلي بالمسجد الكبير و يوم من الأيام ودونا الرحلة للمسيد كان في

معرض عن القيّم وحدي استانست

 

 

 

و صرت أتواصل مع أكثر من شيخ

ما أنسى فضلهم .. صج أني أذيييتهم بالأسئلة .. بس كل شيخ كان

نفس أبوي بالضبط .. خاصة لمن ينادوني " بنيتي " أحلى كلمة

 

شيخ علي – شيخ حاي – دكتور عبدالرزاق

الله يوفقكم دنيا و آخرة ..

و كانت أمنيتي أقرا قرآن بحفلة التخرج بس الحمدلله على كل حال

ابتسموا و صلـوا عالنبي :)